ድመራ (+)

                        

       መስቀል መደመር ነው፡፡ በክርስቶስ ኢየሱስ ያገኘነውን ሕይወት በፍሬ የምንገልጥበት መንገድ! ከትላንት ዛሬ፤ ከዛሬ ነገ የተሻለና የበለጠ ሆነን የምንገኝበት ኃይል ነው፡፡ በክርስቶስ ያየነውን ርኅራኄ ለሌሎች የምንገልጥበት በረከት ነው፡፡ ጥልን ከመካከላችን የምናስወግድበት እርቅ ነው፡፡ በዚህ ዓለም መከራና ፈተና ፊት ትምክህት ነው፡፡ ለምድሪቱ የምናቀርበው መፍትሔ ነው፡፡ እግዚአብሔር ምን ያህል እንደሰጠን ብቻ ሳይሆን ምን ያህል እንደወደደን የፍቅሩን ብርታት፣ የቃል ኪዳኑን ጽናት፣ የተስፋውን ፍፃሜ የምናይበት አደባባይ፤ ከምድር ከፍ ከሰማይ ዝቅ ያለ ቃል ኪዳን፣ ዘመንና ኑሮ ለሁለት የተከፈለበት ውለታ፣ ምሕረትና እውነት፣ ጽድቅና ሰላም የተስማሙበት ማሰሪያ መስቀል (ድመራ) ነው፡፡

       የክርስትናውን መልክ ከሚያደበዝዙ ነገሮች መካከል ዋናው በእግዚአብሔር ቃል ውስጥ የተገለጡትን አሳቦች በትክክል አለመተርጎምና አለመኖር ነው፡፡ በመጽሐፍ ቅዱስ “የተሰቀለውን ኢየሱስን እንድትሹ . . . የተሰቀለውን ክርስቶስን እንሰብካለን . . . (ማቴ. 28÷5፣ 1 ቆሮ. 1÷3)” ተብሎ ተጽፏል፡፡ ለሰዎች መሻት ምላሽ የሚሆነው መሻታችን ሳይሆን ትክክለኛውን እርካታ ማቅረባችን ነው፡፡ የክርስቶስ መለያው መስቀል እንደ ሆነ ሁሉ የክርስትናውም መለያ መስቀል ነው፡፡ ከእግዚአብሔር ጋር ስለ ምቾታችን እየተሟገትን የምንኖርበት ሳይሆን ክርስቶስን በመከራው የምንመስልበትና የመስቀሉን ኃይል በኑሮ የምንመሰክርበት ነው፡፡ ክርስትና ዛሬ ላይ እንዴት እንደደረሰ ታሪክ ስንመረምር ብዙ እውነተኛ ክርስቲያኖች ዋጋ እየከፈሉ፣ የተሰጣቸውን የወንጌል አደራ በደም ጭምር እየተወጡ፣ በቃልና በኑሮ እየታመኑ ነው፡፡ በረከት የምንደምረው ነው፡፡ እግዚአብሔር በመስቀሉ በኩል በክርስቶስ ኢየሱስ ለእኛ የሠራው ሥራ ከንቱ በሆነችው ዓለም ፊት የምንቆጥረው ብልጥግናችን ነው፡፡

        ዛሬ በዚህ ቀን ብዙ ክርስቲያኖች የመስቀል በዓል ደመራ (ችቦ) ሊያበሩ ወደ አደባባይ የሚወጡበት ቀን ነው፡፡ በክርስቶስ ኢየሱስ ለምድሪቱ የመጣውን መፍትሔ፣ የዘላለም ተድላ፣ አእምሮን ሁሉ የሚያልፍ ሰላም እንድናስብ ከረዳን ደግሞም የእግዚአብሔር በግ በመስቀሉ መሠዊያ ላይ ስለ እኛ እንዴት የተቃጠለ መሥዋዕት እንደ ሆነልን ውለታውን ካዘከረን በእርግጥም ተጠቅመናል፡፡ ዳሩ ግን ከሥጋ ሞቅታና ፌሽታ ባላለፈ መንገድ እንደ አንድ አጋጣሚ ቆጥረነው  ከተለያየን በእውነት ይህ መደመር አይደለም፤ ብዙ ነገር ከስረናል ማለት ነው፡፡

        አንድ አባት ከተወሰኑ ዓመታት በፊት ሲያጫውቱኝ “ብዙ ሰው ራዕዩን የሚያቃጥልበት ቀን ነው” አሉኝ፡፡ እኔም ግር ብሎኝ “እንዴት?” የሚል ቀጭን ጥያቄ አቀረብኩላቸው፡፡ “አየህ! አብዛኛው ሰው አዲስ ዓመት መምጣቱን አስመልክቶ አዳዲስ እቅድ፣ ልዩ ልዩ ዓላማና ራዕይ እንዳለው ይለፍፋል፡፡ ታዲያ ልክ የመስቀል በዓል ደርሶ፣ ደመራ ተደምሮ፣ ችቦው ተቀጣጥሎ፣ ደስታና ፌሽታው ተከናውኖ ልክ እንዳለፈ ስለ አዳዲስ ነገር ያወሩህን ሰዎች ባረጀ ነገር ውስጥ ታገኛቸዋለህ፡፡ ስለ ብዙ ዓላማቸው የተረኩልህ ሰዎች አንዱን ማድረግ ተስኖአቸው ታያለህ፡፡ ብቻ የቀደመ ኑሮአቸውን፣ የኮነኑት ታሪካቸውን ሲደግሙት፤ አይጠቅምም! ብለው የጣሉትን ሲያነሡት ልብ ማለት ቀላል ነው፡፡ እኔም ችቦ ሲለኩሱ አብረው ለኩሰውት፣ ደመራው ሲቀጣጠል አብረው አቃጥለውት፣ ወደ ቀኝ ወደ ግራ፣ ወደ ፊት ወደ ኋላ ሲሉ አብረው ከእንጨቱ ጋር ጥለውት፣ አንድ . . ሁለት . . ሲሉ እዚያው እረስተውት ይሆናል በማለት አንተንም ራዕይህን ልታቃጥል ነው ወይ? ብዬ የጠየኩህ፡፡” ብለው አስረዱኝ፡፡

       እኚህን አባት በሕይወት ባይኖሩም ሁሌ ምክራቸውን አስበዋለሁ፡፡ ከዚያም ውስጥ ይህኛው ምክራቸው ልቤን ይነካዋል፡፡ ብዙ ጊዜ አስተውላችሁ ከሆነ እርሳቸው ያሉት በግልጥ ይስተዋላል፡፡ ሰው ሊደምር (አንድም ችቦ ሊለኩስ፣ አንድም መንፈሳዊ ነገር ሊጨምር፣ አንድም . . . ) ወጥቶ እንዴት ሚዛኑን ስቶ፣ የያዘውን ጥሎ፣ ለሥጋው አምሽቶ፣ በየመንገዱ ወድቆ (ሰክሮ)፣ በየአደባባዩ ተዳርቶ፣ ከእውነተኛው ላይ መንትፎ (ሰርቆ)፣ ለአመጽ ተማምሎ፣ ርኩሰት አንሾካሽኮ ይመለሳል? ተወዳጆች ሆይ ለሚሰማ ጥቂት ቃል ብዙ ነው፡፡ እኔም በፍቅር እላችኋለሁ፡- መስቀል መደመር ነው! መልካምነት ጨምሩ፣ ፍቅር ጨምሩ፣ ትእግስት ጨምሩ፣ ርኅራኄ ጨምሩ፣ ይቅርታ ጨምሩ፣ ፆም ጸሎት ጨምሩ፣ ቸርነት ማድረግ ጨምሩ፣ የታመሙትንና የታሰሩትን መጠየቅ ጨምሩ፣ ያዘኑትን ማጽናናት ጨምሩ፣ ወንጌልን መስበክ፣ ለክርስቶስ ዋጋ መክፈል፣ በእውነትና በመንፈስ መኖር ጨምሩሩሩሩሩሩሩሩሩሩሩሩሩሩሩሩሩሩሩ!!