መልክአ እናት

ሰላም ለኪ እናታችን

ባለሽበት እንዳለሽ

አንቺ የተባረክሽ ነሽ

ሰላም ለዓይኖችሽ

ከጭስ ጋራ ለሚማጎቱ

ከእንቅልፍ ጋር ለተፋቱ

ተቅበዝባዥ ፍጡር ሆኜ ኑሮዬን ከምገፋ

ምነው እንባሽን በሆንኩ

ከዓይኖችሽ ስር እንዳልጠፋ፡፡

ሰላም ለከንፈሮችሽ ትላንት ለማውቃቸው

ዛሬ ለምናፍቃቸው

ውዳሴ ክብር ምርቃት

ጭብጨባ ሙገሳ ሽልማት በተረፈበት ቀዬ

ምነው ያ'ንቺን እርግማን - ይናፍቃል ጆሮዬ

ከሌሎች ውዳሴና ክብር እልፍ ጊዜ የተሻለ

ለካ በ'ርግማንሽ ውስጥ እናትነትሽ አለ፡፡

ሰላም ለጣቶችሽ

ለሰዎች የቀረቡ፣ከራስሽ ግን የራቁ

መስጠት መለገስ እንጂ መቀበልን ለማያውቁ

ሰላም ለኪ!

ባለሽበት እንዳለሽ፡፡

(በዕውቀቱ ስዩም፣ የግጥም ስብስብ፣ 2001 ዓ.ም)